पुणे : जीवनात वेगवेगळ्या क्षेत्रांमध्ये उंची गाठल्यानंतरही त्यांच्यातील अंगभूत कलागुणांनी त्यांना पुन्हा कला क्षेत्राकडे आकर्षित केले. ही गोष्ट आहे सात मैत्रिणींची. वेगवेगळ्या हस्तकलांमध्ये पारंगत असणाऱ्या पुण्यातील सात महिलांनी एकत्र येऊन ‘हँडीक्राफ्ट वंडर्स’ या नावाने आपल्या कलावस्तूंचे प्रदर्शन भरवण्याचे ठरवले आहे. पत्रकारनगर येथील दर्पण आर्ट गॅलरीमध्ये बुधवारी, ४ ऑक्टोबर ते १० ऑक्टोबरपर्यंत हे प्रदर्शन सुरू राहणार आहे.
या प्रदर्शनाचे वैशिष्ट्य म्हणजे यामध्ये कापडावर केलेली पेंटिंग्ज, झुमका ज्वेलरी, भरतकाम (एम्ब्रॉयडरी), ‘थ्री-डी हँड एम्ब्रॉयडरी’, स्वयंपाकासाठी लागणारी मातीची भांडी आणि शोभेच्या वस्तू, पारंपरिक व आजच्या काळातील दागिन्यांचा सुंदर मिलाफ असलेले दागिने यांसारख्या अनेकविध गोष्टींचा समावेश आहे.
या सातपैकी एक, अश्विनी जांबोटकर या व्यावसायिक कलाकार असून त्यांनी अनेक मोठ्या कलासंस्थांबरोबर काम केले आहे. त्यांनी कापड वापरून केलेल्या फॅब्रिक कोलाज पेंटिंग्जना ग्राहकांची विशेष पसंती मिळते. ‘साकुरा हँडमेडस’ च्या माध्यमातून त्यांनी दुपट्टा, स्टोल, जॅकेट, टेबलक्लॉथ, उशांचे अभ्रे अशा फॅब्रिक पेंटिंग केलेल्या विविध वस्तू बाजारात आणल्या आहेत. विशेष म्हणजे त्या पेंटिंग करण्यासाठी पुनर्निर्मित कापडाचा वापर करतात.
श्रुती भांगडीकर यांनी अभियांत्रिकीचे शिक्षण घेऊन भिलई स्टील उद्योगाबरोबरच नंतर पुण्यात माहिती तंत्रज्ञान क्षेत्रातही काम केले. रत्नशास्त्राचा एक लहान अभ्यासक्रम पूर्ण केल्यानंतर त्यांना ‘सेमी प्रेशिअस’ खड्यांच्या दागिन्यांमध्ये रस निर्माण झाला. चांदी आणि खड्यांचा कल्पक वापर हे त्यांनी बनवलेल्या दागिन्यांचे वैशिष्ट्य असून त्या ‘झुमका ज्वेलरी’ या संकेतस्थळावर त्या या दागिन्यांची विक्री करतात.
मूळच्या सांगलीच्या असलेल्या वैशाली परांजपे या हाताने भरतकाम (एम्ब्रॉयडरी) करतात. इतर बारा कलाकारांसह त्या फेसबुक व व्हॉटसअपच्या माध्यमातून एम्ब्रॉयडरी केलेल्या कपड्यांचा व्यवसाय करतात. श्यामला लोणकर यांनी चित्रकलेचे व्यावसायिक शिक्षण घेतलेले असून त्याही हाताने पेंटिंग करून उशांचे अभ्रे, पिशव्या, टेबलक्लॉथ अशा वस्तू बनवतात. या प्रदर्शनात त्या थ्री-डी हँड एम्ब्रॉयडरी सादर करणार आहेत.
दीप्ती बवाणे यांनीही चित्रकलेचे व्यावसायिक शिक्षण घेतले आहे. मातीची भांडी आणि मातीच्याच इतर कलात्मक वस्तू बनवण्यात त्यांना विशेष रस आहे. रोजच्या स्वयंपाकासाठी लागणारी मातीची भांडी आणि शोभेच्या वस्तू तयार करण्यात त्यांचा हातखंडा आहे.
मूळच्या वाणिज्य शाखेच्या असलेल्या प्राची साने या शास्त्रीय नृत्य शिकल्या आहेत शिवाय दागिने बनवणे ही त्यांची विशेष आवड आहे. त्यांनी बनवलेल्या दागिन्यांमध्ये पारंपरिक व आजच्या काळातील दागिन्यांचा सुंदर मिलाफ दिसतो. ‘एलन क्रिएशन्स’ या नावाने त्या दागिन्यांचा व्यवसाय करतात.
दीप्ती जाना याही मूळच्या माहिती तंत्रज्ञान क्षेत्रातल्या आहेत, परंतु त्यांना कलावस्तूंची आवड आहे. त्यांनी छोट्या स्वरूपात काम करणाऱया कलाकारांना प्रोत्साहन देण्यासाठी ‘कलावीथी’ हे संकेतस्थळ सुरू केले असून देशातील ठिकठिकाणच्या कलाकारांनी बनवलेल्या वस्तू कोणतेही कमिशन न आकारता या संकेतस्थळावर विक्रीस उपलब्ध करून दिल्या जातात.